01.09.2022 ~

Մարտական եղբայրության մեկ տարին

Իրականացված ծրագրերը և հետագա քայլերը

Սեպտեմբերի 2-ին լրանում է «Մարտական եղբայրություն» միաբանության առաջին հրապարակային հայտարարության մեկ տարին:

Այս առիթով ճիշտ ենք համարում ներկայացնել անցած մեկ տարվա մեջ մեր գործունեության համառոտ հաշտետվությունը:

I

Մարտական եղբայրության իրականացված ծրագրերը (2021-ի սեպտեմբեր-2022-ի սեպտեմբեր)

1 Մարտական պարապմունքներ

Վեցամսյա մարտական պարապմունքների կուրսը՝ «Մեծն Տիգրան» աշխարհազորային գնդի հետ համագործակցաբար:

Նույն համագործակցության շրջանակներում սկսվեց նաև մարտական պարապմունքների բազայի կառուցումը՝ համատեղ օգտագործման համար:

Մարտական պարապմունքների կուրսը, որն իրականացվում է «Մեծն Տիգրանի» բազմամյա փորձի հիման վրա մշակված ծրագրով տևում է 6 ամիս՝ ներառնելով շաբաթը երեքական պարապմունք:

Սրանց մեջ մտնում են տակտիկական–դաշտային, դասարանային–տեսական և կրակային պարապմունքները:

**Ավելի մանրամասն ` **«Մարտական եղբայրության» մարտական պարապմունքները:

Տեսանյութերը տեղադրված էն մեր յութուբ ալիքում՝

2 «Պատերազմ և գրականություն» ծրագիր

Ծրագրի հիմնական նպատակն է 2016 և 2020 թվականի պատերազմների մասնակիցների գեղարվեստական ստեղծագործությունների, հուշագրությունների և այլ նյութերի հրապարակումը, տարածումը և մեդիա աջակցությունը:

Որպես ծրագրի առաջին հրապարակում պատրաստվել է 2020 թվականի մասնակից Ալբերտ Մկրտչյանի «Հրետանավորի օրագիրը» («Անտարես» հրատարակչության և «Կողբ» հիմնադրամի հետ համագործակցաբար), որի հրապարակման ծախսը հավաքվել է հանրային հանգանակությամբ: Գիրքը հրապարակվել է 2022-ի հուլիսին, իսկ շնորհանդեսը տեղի կունենա 2022-ի սեպտեմբերի մեջ:

Այս ծրագրի շրջանակներում նախատեսվում է նաև «Գրական մրցույթի» կազմակերպումը, որի մասին կհայտարարվի մոտ շրջանում:

Տես նաև՝ «Պատերազմ և գրականություն» ծրագիրը:

Հարցազրույց Ալբերտ Մկրտչյանի հետ`

Աշխատանք է տարվում առնվազն ևս երկու գրքի հրապարակման ուղղությամբ:

3 Հայ քաղաքական մտքի գրադարան

«Կողբ» կրթութան, մշակույթի և սպորտի զարգացման հիմնադրամի հետ համատեղ «Մարտական եղբայրությունն» իրացնում է «Հայ քաղաքական մտքի գրադարան» նախագիծը: Շարքի հիմնական խնդիրներից է՝ «հրապարակել եւ վերահրատարակել հայ քաղաքական հիմնականում մոռացված գործերը՝ որպես առանցք ունենալով անկախության գաղափարի ձեւակերպման և զարգացման փուլերը»:

Որպես շարքի առաջին հատոր ընտրված է իր ժամանակին հայտնի գործիչ և գաղափարախոս Ռուբեն Դարբինյանի (1883-1968) « Ռուսական վտանգը » երկերի մոտ 500-600 էջանոց ժողովածուն: Հատորն ընդգրկելու է հեղինակի մեծ և փոքր երկերը՝ 1910-ականներից մինչև 1960-ականներ, բոլորն էլ միավորված մեկ առանցքի՝ Հայաստանի անկախության գաղափարի շուրջ:

Այս պահին ընթանում է գրքի համար նյութերի հավաքման, թվայնացման, խմբագրման, ինչպես նաև անհրաժեշտ ծանոթագրություններ կազմելու փուլը: Հավանաբար գիրքը պատրաստ կլինի հրապարակման մինչև 2022-ի վերջ-2023-ի սկիզբ: Ըստ նախնական պայմանավորվածության այն կհրապարակվի «Անտարես» հրատարակչությունում:

«Հայ քաղաքական մտքի գրադարանը» շարունակական է լինելու , և այսօրվանից արդեն նախագծվում է հաջորդ հատորների բովանդակությունը:

Ավելի մանրամասն՝ «Քաղաքական մտքի գրադարան» նախագիծը:

4 «Զինված ժողովուրդ» հայեցակարգը

Պատրաստվել, հրապարակվել և քննարկման են դրվել «Զինված ժողովուրդ» հայեցակարգի նախնական դրույթները, որոնք վերաբերում են Հայաստանի պաշտպանության ոլորտի արմատական բարեփոխմանը , և հիմնված են լայն համաշխարհային և ազգային փորձի վրա:

Այս հարցի շուրջ «Մարտական եղղբայրության» նախաձեռնությամբ տեղի ունեցավ երեք քննարկում, որին մասնակցեցին տարբեր ՀԿ-ների ներկայացուցիչներ, փորձագետներ և հետաքրքրված անհատներ:

Զինված ժողովուրդ հայեցակարգի նախնական դրույթների հետ կարող եք ծանոթանալ այս հղմամբ՝ «Զինված ժողովուրդ հայեցակարգ» :

Տես նաև այստեղ. «Պատմական բոլոր խոշոր հաջողությունները կապված են զինված ժողովուրդ սկզբունքի հետ»:

Առաջիկայում պատրաստվում ենք շարունակել և լայնացնել պաշտպանության ոլորտի վերաբերյալ առաջարկների, ծրագրերի և նախագծերի ներկայացման գործը:

5 Պատերազմի մասնակիցների ձայնը լսելի դարձնել

Իր գործունեության մեկ տարվա ընթացքում «Մարտական եղբայրությունը» փորձել է իր հնարավորությունների սահմաններում անել ամեն բան, որպեսզի պատերազմի մասնակիցների ձայնը լսելի դառնա ինչպես բուն պատերազմի մասին քննարկումներում, այնպես էլ ընդհանրապես քաղաքականությանը, անվտանգությանը, պաշտպանությանը և այլ ոլորտներին վերաբերող կարևորագույն հարցերում: Մենք կարևորում ենք, որ պատերազմի և անվտանգության մասին խոսույթը դադարի լինել մի խումբ խոսացող գլուխների՝ խոշոր կուսակցությունների ներկայացուցիչների, փորձագետների և այլ «իմաստունների» մենաշնորհը:

Այս նպատակին հասնելու համար նախաձեռնել ենք և մասնակցել ենք տասնյակ հարցազրույցների, որոնց մասնակցել են և՛ «Մարտական եղբայրության» անդամները, և՛ պատերազմի այլ մասնակիցներ :

«Մարտական եղբայրության» անունից տարածվել են բազմաթիվ հայտարարություններ ՝ գաղափարական, քաղաքական, անվտանգության հարցերի վերաբերյալ, որոնք արտահայտում են մարտական եղբայրների տեսակետները:

Նույն նպատակին է ծառայում և մեր գրական ծրագիրը:

Այս պահին մենք կարողացել ենք միավորել մեր շուրջ պատերազմի գաղափարական մարտիկների մի կորիզ, և նպատակ ունենք լայնացնելու այն՝ կազմակերպություններ ստեղծելով ամբողջ Հայաստանի տարածքով:

Մենք նաև շնորհակալ են այն լրատվամիջոցներին, որոնք հատկապես ակտիվ համագործակցեցին մեզ հետ, ինչպես նաև մեր հայտարարությունները տարածողներին: Կոչ ենք անում մյուս լրատվամիջոցներին ևս ավելի ակտիվ լինել՝ պատերազմի մասնակիցների ձայնը լսելի դարձնելու գործում՝ անընդատ նույն դեմքերին խոսեցնելու և լսեցնելու փոխարեն:

6 Արշավներ

Անցած մեկ տարվա ընթացքում կազմակեպել ենք մի քանի արշավներ Հայաստանի տարբեր նշանավոր վայրեր, որոնց մեջ՝ Տափերական ամրոցը Վեդիի տարածաշրջանում Հայաստանի անկախության 30-ամյակին, Նժդեհի գերեզմանը Եղեգնաձորի Սպիտակավոր եկեղեցում Մեծ Եղեռնի հերթական տարելիցին, Տիգրանաշեն (Քյարքի) և Դժոխքի ձոր ՝ մայիսի 28-ին և այլն:

Մեր արշավների թիրախն են Հայաստանի առանցքային հոգևոր և մարտական-ռազմավարական կետերը: Նպատակն է՝ երկրի կենդանի զգացողությունը, հոգևոր, հոգեբանական և մարտավարական պատրաստությունը, բացօդյա քննարկումները:

Առաջիկայում նախատեսում ենք լայնացնել մեր արշավային ծրագրերը:

7 Մեդիա

Բացի մեր ֆեյսբուքյան էջից, որը պարբերաբար թարմացնում ենք՝ ներկայացնելով մեր տեսակետներն ու նորությունները մեր մասին, ստեղծել ենք նաև մեր յութուբյան ալիքը և «Վահագն» կայքը , որը պետք է դառնա մեր «պաշտոնաթերթը»:

Երկուսն էլ դեռ զարգացման փուլում են, և առաջիկայում նախատեսում ենք ավելի ակտիվորեն թարմացնել դրանք, այդ թվում էքսկլյուզիվ նյութերով:

8 Համագործակցություն

Մեկ տարվա մեջ անցկացրել ենք հանդիպումներ և քննարկումներ տարբեր կազմակերպությունների և անհատների՝ գործիչների, փորձագետների հետ, որոնց մի մասի հետ մշակել ենք համագործակցության տարբեր՝ կարճաժամկետ կամ երկարաժամկետ ձևաչափեր:

Մեր լավ ընկերներներից են ՝ «Մեծն Տիգրան» աշխարհազորային գունդը, «Կողբ» հիմնադդրամը, «Բարձունք» ՀԿ-ն և շատ ուրիշներ, որոնց հետ համատեղ նախագծերը մասամբ արդեն ներկայացրել ենք: Մեր համագործակցության ցանկն ու ցանցը նախատեսում ենք հետևողականորեն լրացնել նաև ապագայում:

«Կողբ» հիմնադրամի հետ 2021-ի դեկտեմբերի 23-ին «Մարտական եղբայրությունը» ստորագրել է փոխըմբռնման հուշագիր կրթության ոլորտում համագործակցելու և համատեղ ծրագրեր իրականացնելու վերաբերյալ: Այս հուշագրով կողմերը մասնավորապես պայմանավորվեցին համագործակցել քաղաքական փիլիսոփայության ոլորտում, ինչպես նաև համատեղ ջանքերով իրացնել «Հայ քաղաքական մտքի գրադարան» շարքի հրապարակումը: Ավելի մանրամասն տես այստեղ:

9 Հավելյալ ծրագրեր

Թեև ոչ «Մարտական եղբայրության» անունով, սակայն, «Մարտական եղբայրության» գաղափարների և նպատակների շրջարկում են Եղբայրության անդամ Հրանտ Տեր-Աբրահամյանի նախագծերից՝

«Ռուս-թուրքական վանդակ» հաղորդաշարը`

«Քաղաքական տեսություն» հաղորդաշարը`

II

Հետագա ծրագրերը՝ մինչև 2023-ի սեպտեմբեր

Ճիշտ է, անցած մեկ տարվա մեջ հասցրել ենք իրականացնել մեր ծրագրավորվածի մի մասը միայն , սակայն, տրամադրված ենք ակտիվ և հետևողական շարունակելու ու ծավալելու մեր գործը:

Մոտակա ամիսներին իրականացվելիք ծրագրերի և նախագծերի ցանկում են հետևյալները.

1 Անվտանգության և պաշտպանության ոլորտներում

Ռազմական պատմության և ռազմական տեսության դասընթացներ : Այս ծրագիրը նախնական մշակման փուլում է:

Ավելի երկարատև հեռանկարում՝ «Ռազմական գրադարան» (ռազմական պատմության և ռազմական տեսությանը վերաբերող լավագույն գրականության թարգմանություն հայերեն), ինչպես նաև «Ռազմապատմական հանդեսի» հրապարակում:

«Զինված ժողովուրդ» հայեցակարգի հետագա մշակում , որն ի վերջո պետք է հիմք դառնա պաշտպանության համակարգի բարեփոխման փիլիսոփայության ծրագրի:

Պատերազմի պատմություն նախագիծը : 2020 թվականի պատերազմին վերաբերող դաշտային նյութի հավաքում և ուսումնասիրություն:

2 Գաղափարական և քաղաքական ոլորտներում

Հայաստանակենրոն (հակակողմնորոշումային) ազգայնական գաղափարախոսության հետագա մշակումը, քարոզը և ներկայացումը

Անկախության գաղափարի քարոզչությունը

Ելքի ծրագրի մշակումը և մաս առ մաս ներկայացումը: Ելքի ծրագիրը պետք է ոլորտ առ ոլորտ ուղենիշներ ներկայացնի Հայաստանը պարտության հետևանքներից դուրս բերելու ուղղությամբ

Ազգային հեղափոխության հայեցակարգի մշակումն ու ներկայացումը

Արտաքին քաղաքականությանը վերաբերող հայեցակարգեր և քննարկումներ:

Քաղաքական փիլիսոփայության ոլորտում նախագծերի մշակում և իրականացում: Հատկապես քաղաքական բանականության, քաղաքական ռացիոնալիզմին նվիրված դասախոսությունների, հաղորդաշարերի և այլ ձևաչափերի պատրաստում

3 Մյուս ոլորտներում

Հոգևոր ոլորտում: Այցելություններ և արշավներ Հայաստանի պաշտամունքային վայրեր, ծեսերի և տոների կազմակերպում, հին հայկական հավատքի, ինչպես նաև քրիստոնեության և Հայաստանում ծագած ու զարգացած այլ հոգևոր ուսումքների արժեքների ուսումնասիրություն և արծարծում:

«Պատերազմ և գրականություն» նախագծի շարունակություն և ընդլայնում: Գրական մրցույթների կազմակերպում:

Պատերազմի մասնակիցների իրավունքների պաշտպանություն : Այսօր պատերազմի մասնակիցները այլևայլ խոչընդոտների են հանդիպում առողջապահական, սոցիալական և այլ ոլորտներում: Միայն համակարգված և համատեղ ջանքերով է հնարավոր դրանց լուծում տալ:

Մարզական պարապմունքների կազմակերպում:

Կազմակերպչական ոլորտում

Ծավալում և կազմակերպում Հայաստանի մարզերում